Санхүүгийн зохицуулах байгууллагууд компаниудыг аюулгүй байдлын салбарт “хиймэл оюун ухааны халдлагыг хиймэл оюун ухаанаар няцаах” хүчин чармайлтаа хурдасгахыг уриалав.
БНСУ-ын Ерөнхийлөгч И Жэ Мён өнгөрсөн ням гарагт хиймэл оюун ухаанд (AI) суурилсан кибер халдлагууд санхүүгийн байгууллагуудыг чиглэх нь нэмэгдэж байгаатай холбогдуулан, сүүлийн үед гарсан хэд хэдэн өгөгдлийн алдагдлын хэргийг нарийвчлан шалгахыг тушаасан байна.
Хөх ордноос мэдээлснээр, Ерөнхийлөгч И Жэ Мён санхүүгийн болон улсын байгууллагуудад гарсан өгөгдлийн алдагдал болон тэдгээрийн авч хэрэгжүүлж буй арга хэмжээний талаарх илтгэлийг сонсжээ.
Ерөнхийлөгчийн хэвлэлийн төлөөлөгч Кан Ю Жон “Ерөнхийлөгч албаны хүмүүст хандан үүсээд буй нөхцөл байдалд гүнээ харамсаж буйгаа илэрхийлэн нарийвчилсан шалгалт явуулахын зэрэгцээ хариу арга хэмжээг боловсруулахад бүхий л хүчин чармайлтаа гаргахыг үүрэг болголоо” гэж мэдэгдэв.
Энэхүү мэдэгдэл нь сүүлийн хэдэн өдрийн турш санхүүгийн томоохон компаниудад өгөгдөл алдагдсан хэргүүд дараалан гарсны дараа хийгдсэн юм.
“Shinhan” банк пүрэв гарагт ойролцоогоор 25,000 харилцагчийн мэдээлэл алдагдсан талаар мэдээлсэн бол үүний дараа баасан гарагт “KB Kookmin” банк, “Hana” банк, болон “BNK Busan” банкуудад ижил төстэй хэргүүд бүртгэгджээ. Алдагдсан мэдээлэлд харилцагчдын нэр, утасны дугаараас гадна жилийн орлого, зээлийн лимит зэрэг багтсан байна. Мөн зарим харилцагчдын иргэний бүртгэлийн дугаар (регистрийн дугаар) ил болжээ.
Өгөгдлийн алдагдал нь томоохон банкуудаас хальж, банк бус санхүүгийн байгууллагуудыг ч хамраад байна. Тухайлбал, “Yegaram Savings” банк ойролцоогоор 40,000 харилцагчийн хувийн мэдээлэл алдагдсан гэж мэдээлсэн бол “Hyundai Capital” орон сууцны зээлийн 146 төлөөлөгчийн хувийн мэдээлэл ил болсон гэж мэдэгдэв.
Тэр өдрийн орой санхүүгийн зохицуулах байгууллагууд санхүүгийн салбарын удирдах ажилтнуудтай яаралтай хурал зарлаж, хариу арга хэмжээний талаар хэлэлцсэн байна. Санхүүгийн үйлчилгээний хорооны (FSC) дарга Ли Ог Вон болон Санхүүгийн хяналтын албаны (FSS) дарга Ли Чан Жин нарын даргалсан уг хуралд банкууд, үнэт цаасны компаниуд, даатгагчид, кредит картын компаниуд, хадгаламжийн банкууд болон финтек компаниудын төлөөлөгчид оролцлоо.
Ерөнхийлөгч И Жэ Мён хэлэхдээ, санхүүгийн эрх бүхий байгууллагууд болон компаниуд нэгдсэн хариу арга хэмжээг хэрэгжүүлж, хэрэглэгчдийг хамгаалах болон гарсан хохирлыг барагдуулахад шуурхай ажиллах ёстойг сануулаад, уг халдлагуудад хиймэл оюун ухаан ашигласан байх магадлалыг үгүйсгэхгүй гэдгийг онцолсон байна.
Эх сурвалж: Korea Times
