Тайландын нийслэл Бангкок хотын өнгөрсөн өдрүүдэд орсон аадар борооны улмаас хот даяар гамшгийн онц байдал зарлаж, 4900 орчим хүнийг нүүлгэн шилжүүлэхээс өөр аргагүй болжээ. Хотын захиргааны мэдээлснээр, 52 мянга орчим айл өрх үерт өртжээ. Өнгөрсөн Пүрэв гаригаас Ням гаригийн хооронд хотын зарим хэсэгт хур тунадасны хэмжээ 330 мм давсан гэдгийг цаг уурын албаныхан мэдээлж байна.
Үерийн ус бүрэн татраагүй хэвээр тул онц шаардлагагүй бол гадуур гарахгүй байхыг иргэдэд сануулж байна. Иргэд болзошгүй гамшгаас сэргийлэн худалдан авалт хийж эхэлсэн тул зарим дэлгүүрийн лангуу хоосорчээ. Тиймээс ерөнхий сайдын ажлын алба яаран сандран худалдан авалт хийхгүй байхыг иргэдэд анхааруулаад, үнийг зохиомлоор өсгөх нь гэмт хэрэг гэдгийг сануулав. Мөн ажлын өдөр эхэлсэн ч хэдэн зуун сургууль хаалттай хэвээр байна.
Тайландын засгийн газар үүсээд буй нөхцөл байдалтай холбоотойгоор есдүгээр сарын 28, 29-ний Даваа, Мягмар гарагыг бүх нийтийн амралтын өдөр болгон зарлажээ.
