Францад сүүлийн жилүүдэд тохиогоогүй хүчирхийлэл эмх замбараагүй байдал дэгдлээ. Франц даяар ахлах сургуулийн сурагчдын эхлүүлсэн жагсаал эмх замбараагаа алдаж, үймээн самууны хэмжээнд хүрээд байна. Өнгөрсөн амралтын өдрүүдээр л гэхэд өргөн цар хүрээтэй жагсаалыг дагалдаад улс даяар 1500 гаруй дэлгүүр эвдэрч сүйдсэн, дээрэмдүүлсэн гэдгийг жижиглэн худалдаа эрхлэгчдийн холбоо мэдэгдлээ.
Бямба гарагт олон арван хотод хагас сая гаруй хүн жагсаалд нэгджээ. Ингэснээр нэг сарын турш үргэлжилсэн оюутны хөдөлгөөн амьжиргааны өртөг нэмэгдэж, төрийн үйлчилгээ доройтож байгаад бухимдсан нийгмийн өргөн хүрээний эсэргүүцэлтэй нэгдсэн байна. Парис болон Марсель хотод дахин мөргөлдөөн дэгдэж, цагдаа нар бизнесийн байгууллагуудыг дээрэмдэх оролдлогыг таслан зогсоохоор ажиллажээ.
Франц даяар албан байгууллагууд, аж ахуйн нэгжүүдэд халдсан, дээрэм тонуул хийсэн, гал тавьсан тохиолдлууд бүртгэгдэж, Францын Дотоод хэргийн сайд Лоран Нуньесийн мэдээлснээр, цагдаа нар улс даяар 2400 хүнийг баривчилсан бол 1000 цагдаагийн алба хаагч гэмтэж бэртсэн байна.
Францын Ерөнхийлөгч Э.Макрон телевизээр ард түмэндээ хандаж хэлсэн байна. Тэрээр мөн иргэдээ тайван байхыг уриаллаа. Тэрбээр “Тайван замаар жагсаж буй хүмүүсийн гомдол, шаардлага үндэслэлтэй. Тэдний үйлдлийг эмх замбараагүй байдал дэгдээхийг зорьж буй хүмүүсийн үйлдэлтэй адилтгаж болохгүй” хэмээгээд онц байдал зарлахгүй гэж мэдэгдэв. Гэхдээ шаардлагатай тохиолдолд мужийн захиргааны тэргүүнүүдэд олон нийтийн барилга байгууламж, орон нутгийн бизнесийг хамгаалахын тулд жагсаал цуглааныг хориглох эрх олгох арга хэмжээ авна гэжээ.
