Замын хөдөлгөөний аюулгүй байдлын үндэсний зөвлөлийн дэд даргаар Б.Болдыг томиллоо

Засгийн газрын өчигдрийн хуралдаанаар “МООД” Болдоо нэрээр олонд танигдсан Б.Болдыг Замын хөдөлгөөний аюулгүй байдлын орон тооны бус Үндэсний зөвлөлийн дэд даргаар томилов. Ерөнхий сайд Н.Учрал энэ талаар “Өнгөрсөн таван жил зам тээврийн ослоор 312 хүүхэд амь насаа алдаж, 3861 хүүхэд гэмтжээ. Бараг 10 цаг тутамд нэг хүүхэд зам тээврийн ослоос болж хохирч байна. Эрх бүхий байгууллагууд нь жил бүр нөлөөллийн аян хийж төсөв зарцуулдаг ч үр дүн гарахгүй байна. Тийм учраас Замын хөдөлгөөний аюулгүй байдлын орон тооны бус Үндэсний зөвлөлийн үйл ажиллагааг сэргээж байна. Үндэсний зөвлөл хоёр дэд даргатай үйл ажиллагаа явуулна. Нэг нь хуулиар Зам тээврийн сайд ажиллана. Нөгөө дэд даргаар Б.Болд буюу та бидний мэддэгээр “Моод Болдоо”-г томиллоо” гэсэн юм. Тэрбээр олон нийтийн сүлжээнд нийгмийн орчныг сайжруулах, жижиг алхмаар өөрчлөлт хийх санаачилгаараа олонд танигдсан нэгэн. Түүний хувьд программист мэргэжилтэй бөгөөд өмнө нь СӨХ-ны даргаар ажиллаж байжээ.